Presentación

Nos anos 70 nace esta Asociación da inquedanza duns veciñ@s que ven como este, o seu barrio, cae nunha decadencia total (ruídos, drogas, marxinalidade..) e desidia por parte dos gobernantes que rexen a cidade neses tempos e continúa aínda hoxe en día.

Un dos obxectivos principais foi e segue a ser a revalorización social do barrio, ademais de reivindicar un bo alumeado, rúas limpas de lixo e cheiros desagradables, que os ruídos non excedan os decibelios permitidos, loitar porque o barrio non sexa un punto de venda de drogas, que as casas non veñan abaixo co perigo que isto leva consigo, e un longo etc.

Que facemos

Dende a A.V. do Casco Vello traballamos por unha mellor calidade de vida, por iso:

• Fomentamos a participación en actividades sociais e culturais
• Recuperamos tradicións e dámolas a coñecer dun xeito lúdico
• Dinamizamos o barrio en cooperación con outros colectivos
• E traballamos para que se recoñeza o Casco Vello como unha alternativa cultural e de ocio, para toda a cidadanía.

O obxectivo final é conseguir que o barrio sexa un espazo libre de problemáticas, onde a convivencia entre a veciñanza e as xentes que a el se achegan sexa cívica e agradable.

É por isto que xa dende os comezos a asociación traballa en programas de saúde: en colaboración co Centro de Saúde do barrio e co programa de prevención do grupo de Auto apoio VIH-Sida e adiccións O Imán, na intervención social e urbanística do programa Europeo Urban, proxectos de educación, escola de pais e nais, alfabetización de adultos, clases de recuperación para escolares. Temos desenvolvido distintas actividades no eido da educación en estreita colaboración co C.P. Ramón e Cajal (Picacho) e programas de divulgación mediante conferencias, coloquios a cargo de especialistas en distintas materias (medio ambientais, sanitarias…).

Na actualidade centramos os nosos esforzos na mediación, asesoramento, reivindicación, negociación e prestación de servizo nos problemas relacionados co barrio e a súa veciñanza, planos de actuacións entre os distintos colectivos que operan na zona, maior seguridade, limpeza, alumeado, PEPRI…

Aínda que o ámbito de actuación da asociación sexa plenamente urbano, desenvolvemos unha intensa actividade cultural dedicada á recuperación e conservación das nosas tradicións e festas: Festa dos Maios, Noite Meiga (San Xoán), Entroido: recuperando a figura tradicional do Merdeiro e contando coa comparsa decana de Vigo “Os Tarteiras”, ademais de organizar e facer da conmemoración da Reconquista da Vila de Vigo unha festa de referencia para toda a cidade.

A maiores traballamos noutras festas e eventos de menor calado pero tamén coa súa importancia: recuperación dos cantares e danzas de reis, Certame de música mariñeira, Certame de poesía no Día das Letras Galegas…

Achégate e participa

Se cres que paga a pena traballar por mellorar a túa calidade de vida e o teu barrio, pasalo ben, aprender, participar e manter vivas as festas e tradicións que nos unen, debes saber que non hai outra forma de acadalo que traballando todos e todas xuntos e xuntas de forma organizada, por iso somos xa moitos e moitas as persoas que participamos na A.V. do Casco Vello, porque sen ti nin o teu barrio nin a túa asociación somos nada…

ACHÉGATE !! COÑÉCENOS !! PARTICIPA !! COLABORA...CONNOSCO !!
A asociación somos tod@s